6

امن کیلئے آخری حد تک جائیںگے : وزیراعظم عمران خان

دونوں رہنماؤں کی ملاقات کے حوالے سے جاری اعلامیے کے مطابق وزیر اعظم عمران خان نے افغان صدر اشرف غنی کو دورہ پاکستان کی دعوت دی۔

اعلامیے کے مطابق دونوں رہنماؤں نے انفرا اسٹرکچر، توانائی منصوبوں میں تیزی لانے اور نئے ریل روڈ منصوبوں پر اتفاق کیا۔

ملاقات میں پاک افغان دو طرفہ تعلقات اور افغان امن عمل پر گفتگو کی گئی۔ افغان صدر سے ملاقات میں وزیراعظم عمران خان نے کہا کہ جمہوری، خودمختار افغانستان کیلئے پاکستان حمایت جاری رکھے گا، ہمیشہ سے مؤقف ہے کہ افغانستان تنازع کا کوئی فوجی حل نہیں، افغانستان میں امن و استحکام کا واحد حل مذاکرات، سیاسی تصفیہ ہے۔

وزیراعظم عمران خان نے وسیع البنیاد، جامع سیاسی تصفیہ کی اہمیت بتائی اور کہا کہ پاکستان امن عمل میں افغانوں کے فیصلوں کا احترام کرے گا۔

وزیراعظم نے خبردار کیا کہ کچھ لوگ امن کی کوششیں خراب کرسکتے ہیں۔

اسلامی جمہوریہ افغانستان اور اسلامی جمہوریہ پاکستان کے درمیان مشترکا نظریہ کے عنوان سے ایک دستاویز بھی جاری کی گئی، دستاویز جاری کرنے کا مقصد پاکستان اور افغانستان سمیت خطے میں امن واستحکام پیدا کرنے کی کوشش ہے، مشترکا نقطہ نظرکا مقصد دونوں ممالک کے درمیان سیاسی، معاشی اورعوامی رابطے آگے بڑھانا ہے۔

اعلامیے کے مطابق پاکستان اور افغانستان نے سلامتی اورامن سے متعلق امورکو آگے بڑھانے کیلئے کمیٹیاں تشکیل دینے پراتفاق کیا، وزیراعظم نے متعدد شعبوں میں دوطرفہ تعاون مستحکم کرنے کیلئے اعلیٰ سطح کی قیادت کے تبادلے پراطمینان کا اظہار کیا۔

وزیراعظم عمران خان وزارت عظمیٰ کا منصب سنبھالنے کے بعد پہلی مرتبہ افغانستان گئے ہیں جہاں کابل پہنچنے پر ائیرپورٹ پر افغان وزیر خارجہ حنیف اتمر نے وزیراعظم عمران خان کا استقبال کیا جبکہ صدارتی محل میں وزیراعظم کا سرخ قالین استقبال کیا گیا۔

اس خبر پر اپنی رائے کا اظہار کریں

اپنا تبصرہ بھیجیں